Programi 6 Mujor "Kujdestar për të Moshuar"

Kujdestari për të moshuar është i aftë të kryejë detyra profesionale si i punësuar apo i vetëpunësuar në qendra rezidenciale ose ditore për të moshuar, në shërbimet komunitare të përkujdesjes, në spitale, etj. Për realizimin me sukses të këtyre detyrave, kujdestari duhet të zotërojë njohuri profesionale që lidhen me konceptet dhe procedurat bazë, si dhe shprehi praktike që përfshihen në veprimtarinë e kujdestarit për të moshuar.

Suksesi i kujdestarit për të moshuar është i lidhur ngushtë me sjellje si gjakftohtësia, shkathtësia, kujdesi, përqendrimi, mospërdorimi i pijeve alkoolike, saktësia, korrektësia dhe disiplina. Profesioni është i lidhur me procedurat e punës për plotësimin e nevojave bazike dhe shëndetësore, zhvillimin e aktiviteteve argëtuese, bashkëpunimin me familjen/të afërmit e të moshuarit. Ai/ajo mund të punësohet në qendra sociale-shëndetësore, qendra ditore, rezidenciale apo rehabilitimi që ofrojnë shërbime për të moshuarit. Me përvojë dhe kualifikime shtesë mund të avancojë në nivelin e kujdestarit të kualifikuar, e më pas, përmes kualifikimit të mëtejshëm, mund të marrë funksione mbikëqyrëse si menaxher i një qendre rezidenciale ose ditore për të moshuar.

Ndjekja e shkollës së lartë çon në diplomimin e specialistëve të këtij profesioni në nivelin e shkencave mjekësore teknike dhe shkenca sociale. Për të zhvilluar aktivitet privat dhe për vetëpunësim, kërkohet regjistrimi për ushtrim aktiviteti si person fizik apo juridik, sipas rastit. Ky kurs përgatit kursantët me kompetenca profesionale për të ushtruar veprimtari të përfshira në njësinë "Kujdestar për të moshuarit", me kod 5323.02, referuar Listës Kombëtare të Profesioneve.